NAKED AND AFRAID

 NAKED AND AFRAID

Zama Darchhun

(11-5-2020, 11:00 a.m.)

THUHMAHRUAI TLEM

Tam zawk chuan he reality show hi kan lo hre tawh mai thei a; hre lo pawh kan awm mai thei e. Tin, he show-ah hian Mizo kan lo tel ve tawh reng a ni tih hria pawh kan awm lo mai thei a, hria kan awm a nih pawhin kan tam lo hle ang. Chutiang chu thil awm dan a nih laia Mizo zu tel ve awmchhun ka ni hi a hnam ang zawnga ngaihtuah pawhin a ropui ka ti a, chapona-ah min ngaihsak lo ula, kei tih loh Mizo zingah zu tel ve kan la awm loh avang hian a chhuan pawh ka inchhuang viau mai.

Naked and Afraid chu eng nge a nih, tih leh chutah chuan engtia inhnim pil thei nge ka nih, tih leh ka zuk khawsak dan vel chanchin hi han sawi ka tum chu a ni a. Chona kan hmachhawn lai chuan hrehawm hle mah se, tawnhriat tha tak a nih avang leh tun thlenga nuamsa taka ka khawsak theih phah chhan hi he show-a ka tel vang a ni a, ka ngaihlu hle a. Tin, khang harsatna leh hrehawmna kan tawrh kha mi nazawngin an paltlang theih loh, mi bikte chauhvin an paltlang theih a nih avangin a ropui ka ti a, chung zinga ka tel ve thei kha ka lawm em em bawk. Lehlamah chuan kei hian zuam viau eng ang mah ila, Pathian hruaina tel lo chuan kha chona kha ka pal chhuak zo dawn hauh lo tih ka hria a, Pathian hnenah pawh lawmthu ka sawi fo thin.

NAKED AND AFRAID CHU ENG NGE?

Naked and Afraid hi American reality series niin Discovery Channel-in a pechhuak thin a. Mipa leh hmeichhia, la inhmu ngaih hauh lote chu ni 21 (kar 3) chhung ramhnuaiah an awmtir a, dam khawchhuak turin an thiam leh theihna hmangin an bei ta thin a ni. Chung mi pahnih (mipa leh hmeichhia)-te chuan thawmhnaw (underwear chenin) an inbel tur a ni lo va, pheikhawk chu sawi loh, silipar takngial pawh an bun phal a ni lo. A awmzia chu ruak-tangkawngin ni 21 chhung ramhnuaiah an khawsa dawn tihna a ni. Chemte/chem leh fire starter (lighter) erawh ken phalsak an ni thung. Mipa leh hmeichhia chu a hrang ve vein an kalpui a, an hmun ruat an thlenah an thawmhnaw zawng zawng phelhin an kawppui tur an zawng ta thin a. Chutiang chuan ramhnuaiah an chhuah tawp mai a, an kawppui tur nen an inhmuh hnuah buk an sual a, a hmasa berin mei chhem an tum thin. A boruak hi chhun lamah a lum em em laiin zan lam chu tawrh theih loh khawpa vâwt-te a ni thei thung a. Hei vang hian mei chhem hmasak kha tihmakmawh a ni a, mei an chhem theih loh chuan vawtin a hmet a, zanah an mu tha thei lo va, an chau vat mai thin a ni. Tin, mei hi intihlumna chauh ni lovin rannung leh ramsate laka invenna ralthuam tha tak a nih avangin mei chhem kha a pawimawh em em a ni.

Tin, inkawpte chetla vel hi camera crew-ten an vil reng a, mamawh huna an hriselna en fel turin medical team an awm bawk. Tin, night vision camera pek an ni a, hei hian camera crew-te awm loh hnu, zan lama an chetla vel an record thin bawk. An nghawngah an tawng vel lo record-na turin microphone an awrh thin bawk. Chona hmachhawntute chu eng hunah pawh an inhnuhdawh phalsak an ni a, show tinah hian inhnukdawk an awm ziah tih theih a ni. An inhnuhdawh chhan ber chu ei leh in mumal loh vang leh zan mut that loh avanga taksaa harsatna neih vang a ni thin. An kawppuiten an inhnuhdawhsan chuan pakhat chauhvin chu chona chu a hmachhawn a lo ngai ta a, a hautak zual sauh thin a ni. Chona chu an hneh hnuah pawh hruai chhuah (extraction) an nihna tur hmun kha ke ngata an pan a la ngai cheu va, taksa chauh tawh lamah lui khawkrawk leh tlang kar vela han kal leh hrep kha chona khirh tak a la ni cheu bawk. A ram azirin motor-in emaw, lawngin emaw, helicopter-in emaw an hruai chhuak thin. Ramhnuaia hruai an nih hma hian an rih zawng an chhinchhiah a, challenge an hmachhawn zawhah (ni 21 hnuah) an bûk leh a, thenkhat chu 7kg – 10kg velin an rihna a tlahniam hman thin. Kei pawh 10kg laiin ka rihna a tlahniam hman a, ni 21 (kar 3) a ral meuh chuan cher chhe tak ka ni, ka chau viau bawk. Tin, kan theihna, kan chakna hi statistic takin min chhutsak vek bawk a, chu chu PSR (Primitive Survival Rating) an ti a, a tira ka PSR rating chu 7.2 a ni a, ni 21 a ral a, ka PSR an han chhut leh chuan 8.5-ah a kâng dawrh mai zu nia.

Tun dinhmunah (he thu ka ziah lai) hian Naked and Afraid hi khawvel ram 40 velah an kalpui tawh a, US-ah hian State 8-ah an kalpui a, Africa-ah hmun 6-ah, Asia-ah hmun 6-ah bawk, Europe-ah hmun 3-ah, North America-ah hmun 10-ah, South America-ah hmun 7-ah leh Oceania-ah hmun 2-ahte an kalpui tawh a ni. Tin, Naked and Afraid hi June ni 23, 2013 atanga bul tan a ni a, season 11 awmin, episode 118 a awm tawh bawk.

ENGTIN NGE NAKED & AFRAID-AH CHUAN KA TEL VE?

Survival challenge hi ka tuina lam a ni a, hei vang hian ramhnuaiah ka chetla tam a, kar khat dawn dawn hi mahniin ka va inkulh a, kan siam chawp ni lo, Pu Zirsangzela’n Perhkhuang awih loh zaikung a tih, khawvel pianpui rimawi hrang hrang va ngaihthlak veng vengte hi a manhla ka ti em em thin. Hei vang hian hun awl ka neih phawt chuan keimah mai pawhin ka chhuak thin a. Chutiang mi chu ka nih avangin YouTube-ah pawh hian hetiang lam hi ka en nasa a, hmuhnawm pawh ka ti viau. Chutia YouTube ka en kualna lamah chuan a nia he TV Show hi ka hmu fuh tak reng chu ni. Engtin tin emaw an Executive Producer-te ka be pawp a, a tawi zawngin, tel ve tumin hma ka la ta tiin sawi mai ang aw. Mizoram leh Mizo pawh chu an lo la hre mang hauh lo mai a, chuvang tak chuan ka tel ve pawh chu an remti niin ka hria. Tel ve thei tura kan inbiak fel hnuah lo nghak lawk turin min ti a, ka nghak ta vang vang a. Chutih chhungin keimah lam chu ka lo inpuahchah ve a, taksa ka sawizawi nasa a, ramhnuaiah a hma aia nasain ka camp bawk a, min koh thut pawha kal mai thei turin ka inbuatsaih sauh sauh mai a ni. Thla khat hnuah chuan min rawn ko ta a, phurna leh helhhawlhnain min man vel a, ka kal dawn zante chuan muthilh a har hle.

NAKED AND AFRAID HMUNPUI LEH KA KAWPPUI

A tawi zawngin sawi zel ila, Naked and Afraid hmunpui (home base) hi United States-a Louisiana hmunah a ni a, chumi lam pan chuan ka ar kawh chhuah ve tawp mai a. Ka thlen hlim chuan endik dan hrang hrangin min endik a, ka hriselna te, ka rilru leh nungchang thlengin min endik a, a hma lama ka sawi tawh ang khan ka PSR (Primitive Survival Rating) rating chu 7.2-ah min chhut chhuahsak a. Challenge kan hmachhawnna hmun tur hi Mayan Forest an tih, Belize hmunah a ni. Tropical Forest niin Northern Guatemala leh South-eastern Mexico/ inkara awm a ni a, hmun hnawng leh lum si, ruahtui tlak tamna hmun a ni. An sawi danin he ramngawah hian rannung tur nei chi hrang hrang, maimawm leh rûl a tam em em a, keite (Jaguar) kan tih tamna a ni bawk. Ramngaw a bit avangin chhunah pawh a thim deuh ruih a, zanah phei chuan *ai mit thlawn ang vel a ni. Sap chuan Total darkness tih hi an lam ngun hle a, kei chuan, “Nangni’n ‘total darkness’ in tih chhen hi Mizo chuan ‘ai mit thlawn’ kan ti a ni,” te kan ti vel a, dik hlein an hria. Hetiang hmun harsa hi intihsiakna atan hian an thlang thin reng a. A then chu Africa ram thlaler hmunte pawh an thlang bawk. Ka kawppui tur hi Annie, kum 27 mi a nih thu leh Illinois lam mi a nih thu min hrilh a, fanu pakhat a nei tawh bawk niin an sawi. Amah hi hmeichhe hrisel tha tak, chak leh in-fit tak a ni a, tlang lawn leh cycling lam nuam ti mi a ni nghe nghe a, kawppui tha tak ka nei dawn niin ka hria a, ka lawm hle.

CHONA HMANCHHAWN TAK TAK TURIN

Challenge kan neihna tur lam pan chuan team-te chu kan chhe chhuak ta a, team-ah hian Medical Team, Camera Crew leh Production Crew lam an awm diat a, an hmanraw hrang hrang nen an ri rup mai a ni. Kan tum hmun thleng tur chuan motor-a kal theih chin kan kal hnuah kan in-camp-na tur hmun thleng turin lawnglengin kan kal leh a, darkar engemaw zah kan kal hnu chuan kan tum chu kan thleng ta a. Lawng atangin ka chhuk a, ka thawmhnaw zawng zawng chu kek thlain, Adama Suit tak meuh chuan ka awm ta! Crew hrang hrangin min hual tuau nen thil nuam tak chu a ni hauh lo. Ka puitlin hnua mi hmuh tura saruaka ka awm vawi khatna a ni a, chu achhapah ka thla an la reng nen, ka zak kher mai. Ka inpeih fel hnu chuan lui hnar lam pan chuan ka chho ta a, thui ka la kal hman lo tihah ka kawppui tur nen chuan kan intawng ta a ni. Ani pawh ruak ngalngat a ni a, nalh hai hai tak a ni. A taksa bung hrang hrang chu a invuahna tur takah chuan a invuah dik hlawm hle a, Mizo-ten khal kan tih ang hi a ni. A âwm bawr leh a kumkar vel chu melh loh hram hram ka tum a, han melh zeuh erawh insum a har hle.

Kan han inhmu chu sap chibai dan dik takin kan han inchibai a, kan hming leh khawi atanga kal nge kan nihte kan han inhrilh a, Mizoram ka han lam chuan mak a tih thu leh khawi laia awm nge a ni tih a hriat loh thu a sawi a, ka dem lem lo. Kan inhmuhna piahah chuan kan hmanraw pai chu Mizo iptepui ang chiaha ip siamah hian an lo dah a, kei chuan Mizopa chempui dik tak, hriam bak hlak mai leh fire starter (Lighter) ka paipawn a, ani’n Map leh tui chhuanna tur bêl a rawn keng ve bawk a, chuti chuan kan buk sualna tur lam pan chuan kan inzui ta a ni.

BUK SUAL THU LEH MEI CHHEM THU

Buk sak nan chuan hmun zawl rem deuh lai kan thlang a, ka chempui chu ka la chhuak a, kan vai eng deuh thuak thuak a, bul vela mau leh thingtuai chu ka’n la khawm sawk sawk a, khaw en laia buk sak zawh vat a ngai a. Buk chu kan pahniha len theihna tur tawkin thimhmulah kan sa zo va, ka chetla vel leh ka chem han lek vel chu ka kawppui Annie leh crew-te chuan hmuhnawm an ti hle a, kei anga che zei kha he chona hmachhawntute zingah an la hmuh ngai loh thu an sawi hial a. Buk kan sak zawh chuan mei chhem tumin kan buai leh ta a, ruahtui a tlak tam avangin a hnawng hle a, kan beih fe hnuah mei chu kan chhem thei ta hram a, kan lawm hle. Zan a lo nih chuan crew-te chuan an camp lamah min tinsan ta a. Kan awmna leh crew-te awmna hi inhlat lo te a ni a, amaherawhchu crew-te hian medical emergency bakah min puih phal a ni lo.

Khuain min thim hnan zui tak avangin ei tur kan nei ta lo phawt a, ril a tâm avangin pum a ri ruih ruih a, muthilh a harsa hle. Rannung vak neuh neuh, min bawmtu leh min sehtu a tam em em a, hei hi a hrehawm hle mai bawk. Khawvar hma feah ka harh a, mei ka chhem a, kan piah deuhva luite tui chu ka va chawi a, ka chhuan so hnuah ka in ta khawlh khawlh a. An ram hi Mizoram ang a ni lo va, fimkhur a ngai em em a, tuite hi in mai mai loh tur a ni.

EI TUR ZAWN LEH SARUAK THU

A tawi zawng bawkin - chutiang chuan ni 21 chhung teh meuh kan khawsa dun ta a. Ei tur zawn kha hna hautak tak mai a ni a, chuvangin kan hmuh hmuh kan ei a ni ber mai a, hnapkhawn te, rul te, sazu te, laiking te kan ei a, phe zeuh tawh phawt chu kan ei a ni mai e. Saruak ngalngat kan nihna chu hlauhna leh hrehawmna chuan min theihnghilhtir chiang hle! A tirah chuan ka zak hle a, ka kawppuinu nen chauh ni ila chu a zia tak tur hi a ni a; mahse, camera crew-te nen kan ri rup a, thil nuam tak zawng a ni lo. Sap (mi ngo) erawh an dan a dang zar mai a, an saruak kha engah mah an ngai lo va, zah-ah an la lo reng reng niin ka hria. Thil dang – buk sual, mei chhem, ei tur zawn tih vel kha chu Mizo tan thil harsa pakhat mah a awm lo va, hrehawm ber mai chu Saruak ngalngat-a awm kha niin ka hria.

Chuti chuan eng maw ti tiin ni 21 chu kan tlingtla thei ta a. Kan haw dawn ni chuan kan phur hle mai a. Mahse, min rawn lamtu turte nena kan intawhna tur hmun kha kan buk (camp) atanga hla tak, darkar 3 vel kal ngai a ni a. Tin, kawng a awm lo va, kan thiamnaa inzawn chawp tur a la ni cheu va, lui leh kham chhengchhiate paltlang a la ngai a ni. Ni 21 (kar 3 chhung) zet ei tur mumal nei lova khawsak hnua rampalailenga han kal kha challenge tak mai a la ni cheu va, ka huphurh hle nghe nghe a. Mahse, ka kal chhuah hnua ka pawisa hlawh tur te, chu pawisa hmanga ka dam chhunga nuamsa taka ka khawsak hun turte mithlaa hmu chungin kal chhuah pah chuan banga ka chemkawm thiah chu ka la a, ka thlâm thlanga ka buh hmunah chuan lungawi takin ka zu bung leh ta a……….

DREAM DREAM DREAM….

Hetiang hian nitinin ka hnathawh pah hian ka dream thin a, a zia lo tak tak. Mahse, hetia han dream vel hian hna thawh chhung a ti rei lo va, a tha ang reng phian lawi a. Tin, he show-a mipa-te hi an zei lo hlawm hi ka’n ti khawp a, an bul velah thing leh mau te a tam vei thin nen buk-te hi an sa zei lo thei khawp mai a, zanah vawt an tih a, ruah a sur changa hrehawm an tih theih nen, buk sak hi an thiam hlawl lo. Keini Mizote chuan kan naupan laia buk sa thang leh ramhnuaia chetla thang kan ni a, ka’n huphurh lo mai mai khawp ah! Tin, sa pel leh thangkam velte pawh kan thiam zawng tak a ni a, a ei tur zawn hmuh a huphurhawm loh. He challenge-a Mizo-ten hrehawm kan tih ber tur nia ka hriat chu saruaka awm kha a ni. Mahni chauh chu ni ila, a ziaawm ang a, chuti ni lovin kan kawppui kha hmeichhia an la ni zui a, mualpho mai a hlawhawm alawm le….haaaaa

Zanah lah, buk chep leh chhe zetah pangtilum inchhim tuma insi riala mut a la ngai zui…….A tak takah zu tel ve ta ila, ka zak awm! Ka dul a kiar ropui si!. …. Ka kawppuinu kha ka la hmuh taih zui phei chuan……